Zhvillime Te Tjera Sportive

Zhvillime te tjera sportive

Sdiri, plagoset nga shtiza në "Golden Gala" të Romës

Francezi i kërcimit së gjati po nxehej për garën


Sportisti francez, Salim Sdiri, i cili po përgatitej për garën e kërcimit së gjati është plagosur të premten në mbrëmje nga një shtizë e hedhur nga finlandezi Tero Pitkamak. Ngjarja ka ndodhur në aktivitetin "Golden Gala" që po zhvillohet në Romë. Por, për fatin e tij të mirë, Sdiri nuk ka pësuar asgjë serioze në organet jetësore dhe gjendja e tij po përmirësohet. "Kishte dhimbje, por gjendja shëndetësore është e mirë", tha njëri prej mjekëve të spitalit "Xhemeli", ku sportisti u dërgua me urgjencë. Në orën 02:00 të mëngjesit të së shtunës, francezi doli nga spitali dhe tha: "Hedhësit e shtizës po nxeheshin afër nesh dhe ndieja frikë se diçka e tillë do të ndodhte".

Bonds, rekordi nën hijet e dopingut

Bejsbollisti Berri Bonds ka barazuar një rekord historik të këtij sporti në SHBA, pasi ka shënuar gjuajtjen e tij të 755 jashtë fushe, po aq sa legjendari Aron. Por ky rekord nuk ka bërë bujë vetëm pozitivisht, pasi mediat dhe tifozët kanë hedhur dyshime se Bonds ka përdorur steroidë gjatë karrierës së tij. Gjithçka ka ardhur pasi në vitet e fundit ai është përmirësuar ndjeshëm në lojën e tij, ndonëse në moshën 42-vjeçare. Lojtari u përfshi para dy vitesh në skandalin e laboratorit "Balco", i cili prodhonte dhe shpërndante steroidin sintetik THG, por ka hedhur poshtë të gjitha akuzat që i janë bërë gjatë këtyre viteve.

Berri Bonds, rekordmeni absolut në bejsboll
Lojtari i San Francisko Xhajants ka realizuar gjuajtjen e 756 jashtë fushe në karrierë



Rekord. Që prej ditës së djeshme, kjo fjalë është pjesë e jetës së Berri Bonds, që në orët e vona të mbrëmjes së të martës ka realizuar gjuajtjen numër 756 jashtë fushe në karrierën 20-vjeçare në bejsboll. Kundërshtar në ndeshjen ku Bonds ka thyer rekordin e Henk Aron, që zgjaste që prej vitit të largët 1976, ishte Uashington Nejshënalls. Aksioni i gjuajtjes historike ka ndodhur në fund të pjesës së pestë të lojës (bejsbolli në Amerikë luhet me nëntë pjesë), kur rezultati ishte në barazim 4-4. Bonds paraqitet në vendin e goditjes, në momentin që skuadra e tij gjendej në situatë mjaft të vështirë: të gjitha bazat ishin boshe dhe pak çaste më parë gjuajtësi i Uashingtonit, Majk Baksik, kishte eliminuar një lojtar të San Franciskos. Berri e gjuan topin fort drejt cepit të djathtë të fushës, në stadiumin "At&T Park", pritësit e Nejshënalls nuk mundën të bënin gjë dhe sfera përfundoi në tribuna. Praktikisht ndeshja mbyllet me këtë episod (rezultati final 8-6 për Uashingtonin), pasi skuadra kundërshtare, por edhe e gjithë tifozeria, ishte e përqendruar në festën për gjuajtjen rekord. Bonds ka regjistruar gjuajtjen numër 756 jashtë fushe, një rekord absolut: fishekzjarrë, duartrokitje nga të gjithë të pranishmit dhe përqafime me familjen. Në atë mbrëmje, përveç numrit 25, protagonistë janë bërë edhe dy personazhe të tjerë: natyrisht që i pari është gjuajtësi i Nejshënalls, Majk Baksik, i cili është lojtar rezervë, e që në fillim të sezonit aktivizohej në Ligat e Ulëta. Në momentin që rekordmeni i San Franciskos po bënte xhiron e nderit, Baksik ka hequr kapelën në shenjë nderimi. Heroi tjetër i mbrëmjes ka qenë edhe Met Mërfi, tifozi që ka pritur topin, i cili ka përfunduar në tribunë. Ky i fundit është shoqëruar nga policia gjatë largimit nga stadiumi, e mund të cilësohet padyshim si një nga fituesit e asaj mbrëmjeje: nëse ndonjëherë do dëshirojë ta shesë topin e pritur, padyshim që përfitimi financiar do jetë i madh.

Gei triumfon edhe në 200-metërsh

Tajson Gei ka konfirmuar momentin e shkëlqyer që po kalon dhe pas medaljes së artë në garën e 100 metrave, dje ka triumfuar edhe në garën e 200 metrave. Kjo është medalja e dytë e artë e fituar nga garuesi amerikan në Botërorin e atletikës, që po zhvillohet në Osaka. Koha e regjistruar nga Gei ka qenë e shkëlqyer (19"76), ndërkohë që në vendin e dytë ka përfunduar rivali i tij nga Kuba, Usein Bolt, me kohën 19"91. Medalja e bronzit është marrë nga amerikani tjetër, Uallas Spirmun.