Football

Një talent amator refuzon klubet e mëdha

Gazeta britanike "The Times" ka botuar dje një histori thuajse të pabesueshme rreth një futbollisti amator, i cili ka refuzuar ekipe të Premiership, ndërsa nuk pranon të paguhet për të luajtur. "Përse duhet të më paguajnë për të luajtur futboll, nuk është e drejtë të marrësh rrogë për një gjë që është thjesht argëtim, ndërsa ka njerëz që vriten çdo ditë në botë", është justifikimi i 19-vjeçarit Dankan Uilliams, i cili aktivizohet me amatorët e Garforth Taun. Mesfushori i ri është kërkuar deri tani nga tre klube të Premiership, por ka refuzuar, duke preferuar që të vazhdojë punën e tij si vullnetar në një qendër fëmijësh.

Runi, jashtë fushave të lojës për dy muaj

Ferguson konfirmon lajmin e keq për sulmuesin, por nuk mendon për t‘u kthyer në merkato



Mançester Junajtid ka bërë të ditur se sulmuesi Uejn Runi do të mungojë për dy muajt e ardhshëm, pasi pësoi një frakturë në këmbën e majtë në ndeshjen e parë të kampionatit. Incidenti i dëmtimit të Runit ndodhi pranë fundit të pjesës së parë të ndeshjes me Riding. Një ndërhyrje me vonesë e mbrojtësit Djuberri bëri që ky i fundit të godiste këmbën e sulmuesit të përfaqësueses angleze në vend të topit. Runi u ndihmua nga stafi mjekësor dhe u kthye në fushë për disa minuta, por më pas ai nuk u kthye për të vazhduar në pjesën e dytë të ndeshjes. Aleks Ferguson dha urdhër që sulmuesi 21-vjeçar të kryente një skanim dhe u konfirmua menjëherë varianti më i keq i mundshëm. Me Runin jashtë loje dhe me Sahan e Solskjaer që sapo janë kthyer nga dëmtimi, Ferguson duhet t‘i japë tashmë shansin argjentinasit Karlos Tevez të zbresë në fushën e lojës. "Po mendoja që më parë të përdorja Tevez ndaj Portsmuthit, por tani duket si zgjidhja e vetme që kemi për sulmin", deklaroi dje Ferguson. Por, as argjentinasi nuk po e përjeton një moment të mirë, gjithmonë në lidhje me transferimin e tij të diskutueshëm te "djajtë e kuq". Boka Juniors, ish-skuadra e tij e parë, nuk beson se sulmuesi ka kaluar në formën e huazimit te Mançester Junajtid dhe ka konfirmuar se do t‘i kërkojë FIFA-s të zhvillojë një hetim. Nëse kalimi i Tevez do të cilësohet si blerje, klubi i Boka Juniors do të përfitojë 5 milionë euro nga marrëveshja, si skuadra e tij e parë. Për më tepër, kur Tevez iu shit grupit menaxhues MSI, në kontratë u përfshi një klauzolë që i njihte klubit argjentinas të drejtën e 20% të përfitimeve në rast të shitjes përfundimtare të futbollistit.

Kaka, "Lojtari më i Mirë" i UEFA-s

Nga Milani nderohen edhe Maldini me Sedorf. Çeh shpallet portieri i vitit



UEFA ka shpallur dje fituesit e çmimeve prestigjioze të edicionit të kaluar të aktiviteteve të saj, në ditën e hedhjes së shortit të Ligës së Kampioneve. Gjithçka duket e veshur me ngjyrat kuqezi të Milanit, fitues në fuqi i këtij trofeu, që merr edhe vlerësimet individuale për lojtarët. Skuadra e Ançelotit ka humbur vetëm në garën e portierëve, ku ka fituar Peter Çeh i Çelsit, duke mundur Didën dhe Reinan. Ndërkohë, në mbrojtje ka dalë triumfues kapiteni legjendar Paolo Maldini, i cili ka lënë pas emra të tjerë të njohur si Karvajo, Nesta apo Terri. Më pas, çmimin e mesfushorit më të mirë e ka marrë holandezi Klarens Sedorf, po i Milanit, që ka lënë pas Xherard, Lampard, Skols dhe Pirlo. Ndërkohë, mesfushori brazilian Kaka është klasifikuar këtë radhë mes sulmuesve, duke fituar para Kristiano Ronaldo, Drogba, Runi apo Toti. Më pas është përzgjedhur edhe lojtari më i mirë dhe Kaka ka regjistruar një tjetër sukses. Në votim morën pjesë të 16 trajnerët që kaluan në fazën e 1/8 të finaleve të Ligës së Kampioneve, ndërsa votimi për Kaka si futbollisti më i mirë ka qenë unanim. Ky është hapi i parë i brazilianit drejt një objektivi më të rëndësishëm, atij të "Topit të Artë", i cili jepet në muajin dhjetor.

Zbardhet shorti, buzëqeshin Milan dhe Inter



Tridhjetë e dy klube në garën për fitimin e trofeut më të rëndësishëm në Evropë



Milani kampion në fuqi i Ligës së Kampioneve dhe Interi, një nga pretendentët kryesorë për këtë trofe kanë buzëqeshur dje pas shortit të fazës së grupeve të hedhur në Montekarlo. Skuadra e Ançelotit do të fillojë mbrojtjen e titullit Kampion Evrope nga një ish-kampione e së kaluarës, Benfika. Ndërkohë, skuadrat që do të plotësojnë Grupin D janë Sëlltik dhe ukrainasit e Shaktar Donjetsk. Skuadra portugeze ishte kundërshtari më i lehtë që gjendej në vazon e dytë, por përballja do të jetë mjaft interesante, edhe për faktin se te Benfika luan Rui Kosta dhe Fredi Adu (amerikani i talentuar 19-vjeçar). Për sa i përket Sëlltikut, kuqezinjtë kanë kujtime aspak të bukura nga edicioni i kaluar: i kanë mposhtur me vështirësi në fazën e 1/16. Megjithatë, sfida e tanishme është më e lehtë dhe skuadra skoceze nuk mendohet të krijojë shumë probleme. 32 skuadrat pjesëmarrëse janë ndarë në tetë grupe me nga katër ekipe secili, ndërkohë që edhe Liverpuli, finalist i edicionit të kaluar, do të përballet me dy ish-kampione, Porton dhe Olimpikun e Marsejës. Skuadra e fundit që do të plotësojë grupin A janë turqit e Beshiktashit. Me finalen e këtij viti që do të zhvillohet në Moskë, rusët e CSKA-së së Moskës do të provojnë të gjitha shanset për të luajtur në qytetin e tyre. Gjithsesi, ata kanë një detyrë shumë të vështirë, duke qenë se në grup do të ndeshen me Interin, PSV Eind‘hoven dhe Fenerbaçen. Duke parë kundërshtarët, Grupi G është mjaft i thjeshtë për skuadrën e Roberto Mançinit, që këtë vit shpreson të kurorëzohet si skuadra më e mirë në kontinent. Vitin e kaluar zikaltërit ishin përballë Bajernit, ndërsa tashmë ata shihen si "koka e grupit" dhe skuadra e vetme që teorikisht duhet t‘iu bëjë rezistencë është PSV-ja. Rival i vështirë i Interit parashikohet edhe Fenerbaçeja, e drejtuar nga Ziko. Me një lojtar si Roberto Karlos në skuadër dhe me një tifozeri tejet të zjarrtë, transferta në Turqi nuk do të jetë aspak një shëtitje. Edhe pse shorti është hedhur, në fazën e grupeve ende duhet të plotësohet një vend, pasi ndeshja e kthimit ndërmjet Seviljas dhe AEK Athinës nuk është luajtur. Kjo sfidë u shty për në datën 3 shtator, për shkak të vdekjes së mesfushorit 22-vjeçar, Antonio Puerta. Triumfuesi i kësaj sfide eliminatore do të luajë në Grupin H përballë Arsenalit, Steauas së Bukureshtit dhe Slavia Pragës. Ndeshjet e grupeve do të fillojnë më 18 dhe 19 shtator, ndërsa takimet e fundit në këtë fazë do të luhen më 11 dhe 12 dhjetor. Vetëm Milani do të luajë ndeshjen e fundit në grup më datën 4 dhjetor, për shkak të impenjimit në Kupën e Botës për Klube. Fituesit dhe skuadrat e renditura në vendin e dytë do të vazhdojnë në turet eliminatore, me finalen e cila do të zhvillohet më 21 maj në Moskë. Ashtu si ç‘është bërë traditë, skuadrat që do të përfundojnë në vendin e tretë do të kalojnë në turin e 1/32 të Kupës UEFA.

Ndërkohë, nga shorti presidenti i UEFA-s, Mishel Platini ka këmbëngulur në idenë e tij që edhe skuadrat fituese të Kupës të kenë një vend në Ligën e Kampioneve. Ai ka bërë të ditur se në muajin tetor do të kërkojë që Ekzekutivi i zyrave të Nionit të aprovojë këtë ide.



Champions 2007/08 faza e grupeve


GRUPI A

Liverpul

Porto

Marsejë

Beshiktash


GRUPI B

Celsi

Valencia

Shalke 04

Rozenborg


GRUPI C

Real M

Verder B

Lacio

Olimpiakos


GRUPI D

Milan

Benfika

Sëlltik

Shaktar D


GRUPI E

Barcelona

Lion

Shtutgart

Gllasgou R


GRUPI F

Mançester UTD

Roma

Sporting L

Dinamo Kiev


GRUPI G

Inter

Psv Eind‘hoven

CSKA Moska

Fenerbaçe


GRUPI H

Arsenal

Sevilja /AEK

Steaua B

Slavia Praga

Franca i kërkon falje Italisë

Federata Franceze e Futbollit ka menduar të mbyllë përfundimisht debatin e lindur nga trajneri i përfaqësueses së saj, Rajmond Domenek, i cili akuzonte Italinë për trukim ndeshjesh. Ka qenë vetë presidenti Zhan Pierr Eskalet ai që ka kërkuar zyrtarisht fjalë për këtë incident. "Më vjen keq për disa fjalë që janë thënë gjatë javëve të fundit. Ju kërkoj falje pasi e di që vlen ajo që ndodh në fushat e lojës dhe jo deklaratat", tha ai.

Çelsi-Murinjo, vjen divorciAvram Grant, trajneri i ri



Hoze Murinjo largohet nga Çelsi. Lajmi është bërë i ditur nga mediat angleze, të cilat kanë publikuar një deklaratë zyrtare të klubit londinez, e shpërndarë në orën 01:45 të mëngjesit të së enjtes. "Klubi i Çelsit dhe trajneri Hoze Murinjo vendosën që të ndahen pas një marrëveshjeje të përbashkët". Pak më vonë e njëjta deklaratë është shfaqur edhe në sajtin zyrtar të skuadrës në internet, duke konfirmuar se bashkëjetesa e vështirë mes trajnerit luzitan dhe padronit Abramoviç kishte arritur fundin. Kontrata e Murinjos te Çelsi skadonte në vitin 2010 dhe ai përfitonte 8,5 milionë euro në sezon. Si trajner me blutë ai arriti 124 fitore në 185 ndeshje (me vetëm 21 humbje). Sipas tabloidit "The Sun", "divorci" qarkullonte në ajër që prej mbrëmjes së ditës së mërkurë, pasi portugezi u kishte dërguar sms "lojtarëve të besuar": më saktësisht Territ, Lampard dhe Drogbasë, duke u anonçuar largimin nga drejtimi i skuadrës. Sipas zërave pranë Çelsit, Murinjo duket se ka pasur një debat mjaft të ashpër me Abramoviç, ku manjati rus nuk e kishte kapërdirë barazimin 1-1 në ndeshjen e parë të Ligës së Kampioneve me Rosenborgun. Gjithsesi, marrëdhëniet mes tyre vazhdonin të ishin jo të mira edhe gjatë verës, ku palët bënë sikur u pajtuan. Menjëherë pas largimit të Murinjos klubi konfirmoi se në ndeshjen e yjeve kundër Mançesterit (e planifikuar të luhet nesër), vendi në krye të skuadrës do të merret nga Avram Grant, ish-trajneri i Kombëtares së Izraelit. Ky i fundit ka filluar të punojë te Çelsi gjatë kësaj vere (madje duke u cilësuar si zëvendësuesi ideal i Murinjos), pasi ishte vetë Abramoviç që e kërkonte. Jo më kot në momentin e zbarkimit të Grant, trajneri portugez kishte shprehur pakënaqësi, pasi e dinte se në gabimin më të vogël do "t‘i fluturonte koka". Detyra si ndihmëstrajner do të mbulohet nga Stiv Klark, asistentmenaxher i Çelsit. Gjithsesi, Grant dhe Klark cilësohen si një zgjidhje provizore dhe e përditshmja "The Sun" ka përpiluar një listë me emra të mëdhenj, të cilët do të marrin skuadrën në të ardhme. I pari në listë është Sven Goran Erikson (trajneri i Mançester Sitit), të cilin Abramoviç kishte provuar ta punësonte që në periudhën kur drejtonte Anglinë. Në listën e dëshirave janë edhe dy italianët, Fabio Kapelo dhe Marçelo Lipi. Ky i fundit ka gëzuar gjithmonë simpatinë e padronit rus të Çelsit, mbi të gjitha pasi arriti të shpallte Italinë kampione të botës. Tjetër alternativë është edhe trajneri Gus Hidink: prej vitesh Abramoviç ka marrëdhënie miqësore me holandezin, të cilit i paguan edhe rrogën në përfaqësuesen e Rusisë. Eksperienca e madhe e Hidink është një garanci në ëndrrën për ta bërë Çelsin skuadrën më të fortë në rang klubesh. Së fundmi flitet edhe për trajnerin e Seviljas, Huande Ramos. Ndërkohë, e përditshmja "Times", që kishte si titull të madh "Goodbye José Mourinho" (Mirupafshim Hoze Murinjo!), duke zbuluar edhe se Horge Mendez, menaxheri i trajnerit, ishte takuar në selinë e klubit për të përcaktuar klauzolat e ndarjes, që të paktën nga ana ekonomike nuk do të kalojnë pa u vënë re. Ajo që dihet është se Abramoviç duhet t‘i paguajë Murinjos disa miliona paund, por ende nuk dihet shifra e saktë.

Morati: Lojtarët janë përgjegjës



Disfata në Ligën e Kampioneve përballë turqve të Fenerbaçes ka zemëruar presidentin e Interit, Masimo Morati, i cili ka vlerësuar si përgjegjës vetëm lojtarët. "Ishte një zhgënjim. Nuk arrij t‘ia vesh përgjegjësinë trajnerit, por një nate për t‘u harruar të shumë lojtarëve. Ata duhet ta kuptojnë që sakrifica dhe besimi im apo i publikut kërkon më pas rezultate. Këta lojtarë i kanë të gjitha për të bërë më të mirën, e rëndësishme është që të besojnë në një gjë të tillë", tha ai.

Man Utd nënshtron Çelsin e Grant

Avram Grant e ka filluar me një humbje karrierën e tij si trajner i Çelsit. Në sfidën përballë Mançester Junajtid, skuadra londineze nuk ka arritur për asnjë moment të dalë në lojën e saj, ndërsa Obi Mikel ka përkeqësuar gjërat duke marrë një karton të kuq që në pjesën e parë. Pas një morie rastesh të krijuara, Mançester Junajtid gjen rrugën e rrjetës në minutën e 45-të me anë të Tevez që qetëson Ferguson. Për të vulosur rezultatin përfundimtar mendon Luis Saha, i cili në minutën e 89-të transformon saktësisht një 11-metërsh të fituar nga vetë ai. Me këtë fitore, Junajtid ngjitet në vendin e dytë në klasifikim.

Juventus merr barazim në Romë
Supersfida e javës së katërt të Serisë A mes Romës dhe Juventusit është mbyllur në barazim 2-2, falë një spektakli emocionues që kanë dhuruar të dy skuadrat në fushë. Sfida shihej si konfirmim i forcës së të dy ekipeve me objektiva të ndryshëm dhe ashtu ka qenë në të vërtetë. Skuadra e Spaletit dominon në minutat e para, por është Juventus që gjen golin e avantazhit me anë të Trezege, pas një kundërsulmi perfekt të nisur nga Del Piero. Duket se verdhekuqtë do ta kenë të vështirë ndaj ekipit të hedhur në fushë nga Ranieri, i cili i kishte besuar shumë prapavijës së tij. Por, për të ndryshuar gjithçka mendon kapiteni Toti, i cili brenda pak minutave arrin të shënojë dy herë, duke kaluar tashmë ekipin e tij në avantazh. Roma dominon në lojë dhe në raste, ndonëse edhe bardhezinjtë nuk dorëzohen lehtë duke shfrytëzuar çdo hapësirë të mundshme që i lë prapavija e verdhekuqve. Del Piero ka një mundësi shumë të mirë për të barazuar rezultatin në fillimin e pjesës së dytë, kur gjyqtari akordon një 11-metërsh për një faull të shkaktuar ndaj Nedved. Por kapiteni i Juventusit gabon nga pika e bardhë duke e dërguar topin jashtë kuadratit. Roma humb disa raste shumë të mira para portës së Bufon, në tentativën për të mbyllur ndeshjen. E ndërsa vendasit nuk janë konkretë, Juventus arrin të godasë përsëri në momentin e duhur, në fundin e ndeshjes ku Jakuinta "shpik" një gol pas një rivënie anësore për të vulosur rezultatin përfundimtar 2-2. Gjithsesi, ky barazim nuk e ka shqetësuar shumë Spaletin, pasi edhe rivalët kryesorë për titull të Interit, janë ndalur në një barazim 2-2 në Livorno. Trajneri Mançini ka shpjeguar se loja e ekipit të tij ishte më ndryshe se ajo e mesjavës, kur u mund në Ligën e Kampioneve. "Na mbetet vetëm të rrimë të qetë dhe kur të kapim përsëri kreun do ta kemi më të lehtë", deklaroi ai me optimizëm. Në vendin e dytë, me pikë të barabarta me zikaltërit është ngjitur Fiorentina, pas fitores 1-0 në fushën e Katanias falë golit të Mutut. Ndërkohë, në këtë pozicion është edhe Atalanata që ka mundur 2-1 Lacion, me një gol të minutës së 95-të të shënuar nga Zampanja. Vazhdon ecuria pozitive e Napolit, ndonëse këtë radhë ekipi i drejtuar nga Edi Reja nuk ka mundur të marrë më shumë se një pikë në barazimin pa gola në fushën e Empolit.