MOTO GP

Info rreth nje prej garave me te cmendura dhe spektakolare ne bote.

Rosi i kthehet fitores, triumf në Holandë

Piloti italian i Jahamas ka bërë diferencën mbi cirkuitin e Asenit, duke parakaluar 3 xhiro para përfundimit liderin e Botërorit Kejsi Stoner

Valentino Rosi rikthehet tek fitorja, duke triumfuar në Cmimin e Madh të Holandës. Piloti italian i Jahamas ka bërë diferencën mbi cirkuitin e Asenit, duke parakaluar 3 xhiro para përfundimit liderin e Botërorit Kejsi Stoner. I nisur nga vendi i 11-të, 7 herë kampioni i botës ka dhuruar spektakël dhe në fund vendi i parë i ka takuar atij. Ndërkohë, vendi i dytë për Kejsi Stoner, ndërsa është rikthyer në pod kampioni i botës në fuqi Niki Hejdën.

Rosi, 60 milionë euro evazion fiskal


Përveç problemeve në pistë, Valentino Rosi tashmë ka probleme edhe me tatimet. Sipas "Adnkronos", agjencisë që përllogarit përfitimet në Itali gjatë viteve 2000-2004, piloti i Jamahas regjistron evazion fiskal të barasvlershëm me 60 milionë euro. Duke pasur në konsideratë shifrën shumë të lartë për të cilën flitet, sipas të gjitha gjasave do bëhet denoncimi i "Doktorit" në gjykatë për krimin e fshehjes së të ardhurave. Gjithçka lidhet me vendimin e Rosit për t‘u transferuar në Londër, në mars të vitit 2000. Piloti jeton prej shtatë vjetësh në Britaninë e Madhe, për të paguar më pak taksa se në Itali.

Dukati fiton gjithçka në Motegi

Kejsi Stoner fiton titullin kampion në Moto GP, ashtu si skuadra italiane



Kejsi Stoner është shpallur zyrtarisht kampion i Moto GP në këtë sezon, ndonëse nuk ka arritur të fitojë Çmimin e Madh të Japonisë në pistën e Motegi. Piloti australian ka përfunduar garën në vendin e gjashtë, por falë renditjes më të dobët të Valentino Rosit, vetëm i 13-ti, ka siguruar matematikisht vendin e parë. Një sukses i pamenduar, po të shihje fillimin e garës në një pistë të lagur ku Rosi dukej i papërmbajtshëm. Por pas tharjes së pistës, pilotët u detyruan të ndërronin motorët dhe kjo bëri diferencën, me Loris Kapirosin që mori vendin e parë në podium. Kjo fitore i ka dhënë edhe skuadrës Dukati titullin kampion, pas 34 vitesh dominim absolut të motorëve japonezë.

Triumfi i Stoner erdhi padyshim në mënyrën më pak të menduar nga të gjithë. Australiani kishte vështirësi të dukshme gjatë të gjithë fundjavës, por në ditën e garës ai është ndihmuar nga kushtet atmosferike, pasi filloi një shi i rrëmbyeshëm. Dukati dhe gomat "Brixhston" ishin më të favorizuara në kushte të tilla dhe që në nisje, Stoner shfaqet i dyti pas Melandrit, duke lënë mbrapa si Rosin, ashtu edhe Pedrozën. Por gara u vendos nga tharja graduale e pistës së Motegit dhe i gjithë avantazhi i krijuar nga kryesuesit e garës u zhduk menjëherë nga ana e ndjekësve që vendosën të ndryshonin shpejt motorët e tyre për të garuar me goma për asfalt të thatë. Mes të gjithëve, Loris Kapirosi u tregua më i afti për të gjetur momentin e duhur për të hyrë në bokse dhe tregoi me kthimin në pistë se ishte shumë më i shpejtë se të tjerët, duke rikuperuar kohën e humbur në pjesën e parë të garës. Ndërkohë, Rosi arrin të parakalojë të gjithë kundërshtarët dhe të dalë në kreun e garës, por ndërrimi i motorëve bëhet i detyrueshëm edhe për të, ndërsa sheh se Dani Pedroza rrëzohet me gomat për pistë të lagur. Italiani kthehet në pistë në vendin e dytë, pas Loris Kapirosit, por detyrohet të kthehet përsëri në bokse për shkak të një problemi në motorin e tij që e nxjerr përfundimisht nga gara dhe i hap rrugën Kejsi Stonerit drejt suksesit botëror. Problemet e Rosit bëjnë që gara të mos ketë më duele dhe Kapirosi shkon i qetë drejt fitores së tretë radhazi në Motegi, i shkëputur ndjeshëm nga Rendi De Punie dhe Toni Elias. Stoner përfundon i gjashti, por merr pikët e mjaftueshme për të festuar titullin tri gara para përfundimit të sezonit, pasi Rosi mbyll garën vetëm në vendin e 13-të me një Jamaha që e tradhtoi përsëri në ditën më të mirë. Gjithsesi, kjo nuk e zbeh aspak suksesin e merituar të Stoner, i cili me 8 fitoret në këtë sezon ka vërtetuar më së miri se i takonte ky titull kampion. Ai bëhet piloti i dytë më i ri në historinë e Moto GP që fiton titullin, pasi e ka bërë një gjë të tillë vetëm 21 vjeç e 342 ditë. Australiani ka festuar në një mënyrë origjinale, duke veshur një fanellë me fotot e idhujve të tij, mes të cilëve gjendej edhe Valentino Rosi.