Tenis

Zhvillime nga bota e tenisit.

Gjokoviç mund Nadal dhe Federer

Bota e tenisit tashmë po bëhet gati të përjetojë një tjetër sfidë mjaft interesante, pasi ka mësuar se mes rivalitetit të Roxher Federer dhe Rafel Nadal, mund të hyjë një tenist i tretë. Bëhet fjalë për 20-vjeçarin serb, Novak Gjokoviç, i cili ka arritur të bëjë hapin cilësor në këtë sport duke mundur fillimisht Nadal e më pas Federer në turneun Masters të Montrealit. Sekretet e këtij kampioni të ri janë një gjuajtje e drejtë shumë e fortë dhe një përqendrim më i madh se spanjolli Nadal, duke u cilësuar tashmë si rivali më i fortë për dy tenistët që po dominojnë arenën ndërkombëtare. Në fakt, tenisti i ri kishte dhënë sinjalet e para edhe në turnetë e rëndësishëm që në fillim të këtij viti, duke u shfaqur rregullisht në gjysmëfinale, për t‘u mundur nga Nadal e Federer. Por, në Montreal ai ka dhënë sinjalin e parë se dëshiron t‘i kalojë të dy tenistët më të mirë aktualisht në qarkullim, pasi, në fakt, i ka mundur të dy brenda pak ditësh. Mendohej se Federer e Nadal do të regjistronin për shumë vite radhazi finale të njëpasnjëshme, pasi dukej se askush nuk mund t‘i ndalte. Por, Gjokoviç ka vërtetuar të kundërtën, me një lojë që përmbledh aftësitë më të mira të dy tenistëve në fjalë. Nadal ka qenë i pari që ka provuar gjuajtjet e drejta të jashtëzakonshme të 20-vjeçarit serb, i cili e mundi në gjysmëfinale. Më pas e kishte radhën "mbreti" Federer, i cili dukej se nuk ishte përgatitur siç duhej për një sfidë të tillë. Gjokoviç ka përfituar nga ky moment hutimi për të shpalosur gjithë talentin e tij dhe për të rrëmbyer një trofe shumë të rëndësishëm, duke i hedhur dorashkën e sfidës dy më të mirëve. Tashmë fjala u kalon këtyre të fundit, pasi entuziazmi që ka pushtuar të gjithë të pasionuarit e këtij sporti mund të ndihmojë Gjokoviç për t‘i mundur edhe në të ardhmen.