Formula One

Informacione rreth zhvillimeve me te fundit te botes magjike te F1,pilote,skuteri,gara etj etj. Aty ku shpejtesia arrin limite te pakrahasuseshme.

MekLaren-Ferrari, gjyq përballë FIA-s

Nëpërmjet një komunikate për shtyp, Federata Botërore e Automobilizmit ka vënë zyrtarisht nën akuzë skuderinë MekLaren, për spiunazh në dëm të Ferrarit.

Ferrari dhe MekLaren do të përballen në Këshillin Botëror të FIA-s më 26 korrik, në lidhje me akuzat për spiunazh të lindura mes dy skuderive. Nëpërmjet një komunikate për shtyp, Federata Botërore e Automobilizmit ka vënë zyrtarisht nën akuzë skuderinë MekLaren, për spiunazh në dëm të Ferrarit. "Thyerje e rregullave sportive, duke poseduar materiale të rezervuar" është akuza e ngritur nga qeveria e Formula Unos. Në këtë mënyrë, ka nisur edhe hetimi sportiv, përvec atij civil që ka nisur prej ditësh tashmë. Mbledhja e Këshillit do të mbahet pas dy javësh në Paris dhe MekLaren rrezikon gjobë, heqje pikësh në klasifikim, përjashtim dhe pezullim, gjë që parashikohet nga neni 153 i Kodit të Formula Unos. Skandali i spiunazhit mes MekLaren dhe Ferrarit nisi një javë më parë, pasi në shtëpinë e inxhinierit Majk Koglan u gjetën dokumenta të makinës F2007 me të cilën garojnë Kimi Raikonen dhe Felipe Masa. Koglan ishte një mik i ngushtë me Najxhëll Stepni, ish-shefin e mekanikëve të Ferrarit, ndaj të cilit skuderia e Maranelos ka ngritur një padi në Prokurorinë e Modenas, për sabotimin e Çmimit të Madh të Monte Karlos. Gjithsesi, në rast të vërtetimit të akuzave, pilotët Hamilton dhe Alonso nuk rrezikojnë penalizim pikësh, por vetëm skuderia.

Një e-mail, prova e fundit ndaj MekLaren

Ferrari dhe Mek Laren do të kenë përballjen e parë midis tyre ditën e sotme, në lidhje me skandalin e spiunazhit që ka përfshirë dy skuderitë më të mëdha të Formula Unos. Këshilli Botëror i FIA-s që do të mblidhet në Paris, do të vendosë në lidhje me masat që do të ndërmerren ndaj skuderisë anglo-gjermane, pasi në shtëpinë e inxhinierit Majk Koglan u gjetën 780 faqe me dokumenta të makinës së re të Ferrarit. Një tjetër provë në dëm të MekLaren është gjetja në kompjuterin e ish shefit të mekanikëve Stepni, e një e-maili që ai ia dërgon mikut të tij tek Koglan dhe ku e lajmëron për dërgimin e materialit gjigand, që kishte të ngjitur projektin e F2007. Edhe pse midis tyre janë vërtetuar disa lidhje të tjera, Prokuroria e Modenas e konsideron këtë një provë thelbësore për të provuar ekzistencën e skandalit të spiunazhit.

Sipas organit të akuzës, kjo është një tjetër provë për të "gozhduar" ish shefin e mekanikëve tek kokëkuqja, i cili vështirë se do t'ia hedhë akuzës për spiunim industrial në dëm të kompanisë në të cilën ishte i punësuar. Ndërkaq, çdo gjë duket gati për ditën e sotme, ku në sallë do të jenë përballë Ferrari e MekLaren. Skuderia e Ron Denis do të përfaqësohet përpara FIA-s me 4 avokatë, të cilëve u duhet të vërtetojnë se drejtuesit e skuderisë nuk kishin dijeni për dokumentat e gjetura në shtëpinë e inxhinierit Koglan. Rreziku kryesor për MekLaren është heqja e pikëve në kampionatin e konstruktorëve, që pritet të jetë masa e FIA-s, duke qenë se pronari Ekleston ka përjashtuar penalizimin e pilotëve për këtë histori. Vetë Stepni nuk do të marrë pjesë në seancë, pasi vazhdon të jetë me pushime, ndërkohë që ai do të përfaqësohet nga avokatja Barbara Pini. Ai ishte edhe njeriu prej nga i cili doli në skenë skandali, pasi hodhi në serbatorin e makinave të Masës dhe Raikonenit, një pluhur mister

Hamilton-Alonso, thellohet kriza



Sezoni i suksesshëm i skuderisë MekLaren rrezikon të kthehet në një dështim të madh. Ndonëse rezultatet në pistë vazhdojnë t‘i japin të drejtë zgjedhjes së Ron Denis për të afruar kampionin Alonso dhe debutuesin Hamilton, debatet mes këtyre dy të fundit po komplikojnë gjithçka. Kur kanë mbetur vetëm 6 gara deri në fundin e sezonit, MekLaren kryeson renditjen e konstruktorëve, ndërsa Hamilton e Alonso janë favoritë për fitimin e titullit. Por dueli brenda skuderisë është bërë aq i ndezur, sa pilotët nuk i flasin më njëri-tjetrit, pasi kanë kaluar gjithë fundjavën e fundit me "dredhi" ndaj njëri-tjetrin nëpërmjet parregullsive të vogla. Kjo mund të komplikojë më shumë luftën e skuderisë anglo-gjermane, e cila është në pritje edhe të vendimit të Komisionit të Apelit të FIA-s për çështjen e spiunazhit industrial.

Fitorja e Hamilton në Hungari nuk është mirëpritur nga Alonso, i cili është zemëruar edhe më shumë pasi ka mësuar se insistimi i britanikut solli edhe dënimin e tij nga FIA. "Deri të shtunën kishte respekt të ndërsjellë, por nga e shtuna, ai ka mbaruar. Jo vetëm në një garë, por gjatë gjithë jetës nuk më kishte ndodhur që të dëmtohesha nga një shok. Nuk flasim me njëri-tjetrin që nga dita e shtunë", ka qenë komenti i Alonsos para gazetarëve, kur është pyetur mbi vendimin e shokut të tij për të reklamuar te FIA rezultatet e kualifikueseve.

Sipas gazetës spanjolle, "Marca", tashmë Alonso po mendon që të largohet nga MekLaren në fundin e këtij sezoni, ndërsa kontrata që ka firmosur është e vetmja gjë që mund ta mbajë të lidhur. "Alonso dëshiron të largohet. Marrëdhëniet me përgjegjësit te MekLaren janë praktikisht të shkatërruara, por kontrata e detyron të qëndrojë", shkruhet në këtë gazetë, sipas burimeve të afërta me pilotin. Më pas shkrimi vijon duke treguar se babai-menaxher i Alonsos është takuar në Hungari me Briatoren, duke biseduar për një rikthim të mundshëm te skuderia Reno, që nga viti i ardhshëm. Por prishja e njëanshme e kontratës ka klauzola të rënda ekonomike dhe Alonso nuk ka luksin ta bëjë një gjë të tillë, ndaj është i vetmi që mund të shpresojë te përkeqësimi i raporteve të tij me pjesën tjetër të skuadrës, në mënyrë që kjo e fundit ta lërë të largohet. Piloti e ka paralajmëruar një gjë të tillë edhe para mediave, të cilat e kanë pyetur nëse do të qëndrojë te MekLaren. "Nuk e di", ka qenë përgjigjja e prerë e pilotit, që u ka hapur rrugë të gjitha spekulimeve të mundshme. Kjo ka bërë që Ron Denis të ndërhyjë duke folur para mediave rreth kësaj ngjarjeje. "Është e pashmangshme që nga ngjarje të tilla të lindin edhe diskutime rreth të ardhmes me skuadra të tjera. Por pilotët tanë kanë kontrata edhe për vitet në vazhdim dhe ne duam që t‘i respektojnë ato", u shpreh shefi i skuderisë MekLaren.
_________________

Anglezët: MekLaren ka pranuar largimin e Alonsos

Sipas "The Times", piloti spanjoll do të lihet i lirë të largohet në fundin e këtij sezoni

Ka mjaftuar një fundjavë për të shndërruar MekLarenin nga një skuderi fitimtare në një fole grerëzash. Pas garës së Hungarisë, gjithçka ka ndryshuar dhe duket se Ron Denis është mërzitur aq shumë me këtë situatë, sa po mendon të largojë të dy pilotët që e kanë shkaktuar, ndonëse ata po udhëheqin skuadrën drejt titujve kampionë. Gazeta "The Times" ka publikuar dje lajmin se Fernando Alonso do të lihet i lirë nga skuderia anglo-britanike në fundin e këtij sezoni, pas kërkesës që kishte bërë Kampioni i Botës në fuqi. "Sipas informacioneve që unë zotëroj, i është thënë Alonsos që mund të largohet, pasi MekLaren është mërzitur nga sjellja e tij. Ron Denis, sidomos, është mërzitur si me Alonson, ashtu edhe me Hamilton", u shpreh burimi brenda skuadrës që aktualisht kryeson kampionatin. Denis nuk i ka pëlqyer komentet e Alonsos për shtypin spanjoll, si ndaj skuadrës ashtu edhe ndaj kolegut të tij, duke u bërë gati të ndërpresë kontratën që i lidh palët. Spanjolli kishte firmosur deri në vitin 2009 dhe përfiton 15 milionë euro në sezon, por nuk do ta ketë të vështirë të sigurojë një skuadër tjetër, pasi thuajse të gjithë do ta dëshironin atë në makinën e tyre. Por, shefi i MekLaren nuk di si ta zgjidhë çështjen "Hamilton", një pilot po aq problematik sa edhe spanjolli. Britaniku i nuk pranon lehtësisht urdhrat dhe strategjitë e skuderisë, kur ajo nuk e favorizon. Kjo u pa qartë gjatë fundjavës së provave, kur ai u dëgjua në radio, duke ofenduar shefin e tij, ndërsa edhe Denis nuk ia përtoi të kundërpërgjigjej. Britaniku duhet të ndryshojë sjelljen e tij deri në fundin e sezonit, pasi me largimin e Alonsos është e sigurt që ai do të jetë piloti kryesor i MekLarenit për sezonet në vazhdim. Mjafton që ai të mësohet me urdhrat e skuderisë dhe të mos bëjë publike çdo polemikë të mundshme brenda skuadrës, një gjë me të cilën ai nuk është mësuar ende në vitin e tij të parë të debutimit. Shpërblimi do të jetë një përmirësim i ndjeshëm i situatës së tij kontraktuale, duke e çuar atë në nivelet e pilotëve më të paguar në garat e Formula 1. Por, gjithçka është në dorën e Alonsos, i cili në garat e mbetura do të përpiqet t‘i shkatërrojë ëndrrat e titullit të shokut të tij.

Furtuna prish pistën e Kinës

Furtuna që ka përfshirë rajonin e Shangait ka shkaktuar dëme të konsiderueshme në pistën e Formula 1 që gjendet në Kinë. Nuk ka pasur të plagosur mes personelit të mirëmbajtjes, por era e fortë prej 140 km/orë ka shkatërruar një pjesë të tribunave. Çmimi i Madh i Kinës zhvillohet më 7 tetor, ndërsa organizatorët nuk janë të sigurt se gjithçka do të normalizohet deri atëherë. "Mund të mos kemi kohën e nevojshme për të riparuar pistën dhe për të rindërtuar tribunat e dëmtuara", u shpreh përgjegjësi i pistës.

MekLaren apelon vendimin e Hungarisë

Ron Denis ka vendosur që të zgjedhë rrugën e "luftës" ndaj çdo vendimi të dhënë kundër skuderisë MekLaren. Shefi i skuadrës anglo-gjermane ka apeluar dje vendimin e dhënë nga FIA për heqjen e pikëve të fituara për klasifikimin për konstruktorë në garën e Hungarisë. Penalizimi i FIA-s u vendos pas problemeve në provat zyrtare, ku Alonso i zuri rrugën shokut të skuadrës, Hamilton, duke mos e lënë këtë të fundit të zhvillojë xhiron e shpejtë. Kjo u cilësua si urdhër skuderie dhe Alonso u penalizua me 5 vende në vijën e nisjes, ndërsa pikët e fituara nga MekLaren në garë u llogaritën të vlefshme vetëm në kampionatin e pilotëve.

Mediat: Alonso mund të tërhiqet nga F.1



Nga Spanja vazhdojnë të dalin lajme të çuditshme në lidhje me Fernando Alonson. Sipas të përditshmes "Marca", mes alternativave që piloti i MekLarenit do të shqyrtojë në fund të vitit është edhe tërheqja nga garat. Gazeta citonte një burim "shumë mirë të informuar", i cili shpjegonte se vendimi mund të vijë për shkak të situatës së vështirë që piloti po kalon, mbi të gjitha tashmë që emri i tij është i lidhur me çështjen e spiunazhit industrial. "Shanset që Alonso të garojë në një tjetër skuadër po kaq konkurruese sa MekLareni, janë të pakta dhe Fernando dëshiron t‘i kushtojë vëmendje familjes së tij". Këto ishin motivimet, që sipas "Marcas" do bëjnë që 2 herë kampioni i botës të marrë vendimin drastik. "Një mrekulli në minutën e fundit? Vetëm nëse BMV-ja, Tojota ose Renaulti do t‘i ofrojnë kontratë".

Formula 1, sot vendimi për "spy story"

MekLareni në ankth, edhe pilotët rrezikojnë penalizime rreth skandalit

Një dosje me 166 faqe për të vënë me shpatulla pas murit MekLarenin dhe detyruar rivalët që të pranojnë përgjegjësitë e tyre. Ky është sulmi që Ferrari ka përgatitur përpara Këshillit Botëror të Automobilizmit. Sot në Paris do të shqyrtohet për herë të dytë skandali "spy story", që prej disa javësh ka tronditur botën e Formula 1. Lajmi është bërë i ditur nga e përditshmja britanike "The Times", e cila citonte strategjinë e akuzave që skuderia nga Maranelo do të përdorte. Bëhet fjalë për një fashikull të ndarë në disa pjesë, i cili përmban detaje ende të panjohura, që do të provojnë pa asnjë pikë dyshimi se MekLareni është fajtore. Sipas asaj që shkruante gazeta, duket se skuadra e drejtuar nga Ron Denis nuk ka shumë shpresa, madje në këtë mes rrezikojnë edhe pilotët. Pavarësisht se FIA i kishte premtuar 3 pilotëve (Alonso, Hamilton dhe De La Rosa) amnistinë në këmbim të bashkëpunimit, nëse MekLareni cilësohet fajtore, dënime do ketë edhe për ata.

Dosja e përgatitur nga Ferrari, që tashmë i është dorëzuar FIA-s, përmban një raport rreth email-eve që kolaudatori Pedro De La Rosa ka shkëmbyer me Fernando Alonson, por edhe përgjime të telefonatave dhe mesazheve ndërmjet Majk Kuglan (ish-shefi i projektimit të MekLarenit) dhe Najxhëll Stepni (shefi i mekanikëve). Nuk dihet ende përmbajtja e këtyre komunikimeve, midis drejtuesve të MekLarenit, të cilët duhet të shpjegojnë komunikimet e shumta (e mbi të gjitha të pazakonta) dhe disa prej protagonistëve të skandalit. Sipas "The Times", kur dy pilotët kishin nevojë të verifikonin një detaj teknik, për t‘u sqaruar rreth zgjidhjeve të reja teknologjike të gjetura nga Ferrari, ata i drejtoheshin Kuglanit, ndërsa ky i fundit i referohej shpjegimeve të marra nga Stepni. Rrethi i kontakteve mund të jetë prova kyçe për të ndëshkuar MekLarenin dhe shefin e saj, Ron Denis. Një burim anonim i gazetës britanike pranë Këshillit të FIA-s ka zbuluar ndër të tjera se pilotët e MekLarenit nuk rrezikojnë skualifikime të gjata, por mundësitë më të mëdha janë që ata të penalizohen ashpër në klasifikimin botëror. Më e vështirë duket situata për skuadrën. Nga njëra anë qëndrojnë dosjet e Ferrarit, ndërsa në tjetrën, nevoja për të provuar se si disa zgjidhje specifike teknike janë zbatuar në makinat e skuderisë anglo-gjermane. "Nuk e kam idenë se si Ferrari do të arrinte të vërtetonte se MekLareni ka përdorur ato informacione", ka thënë burimi. Në lidhje me vendimin ka folur edhe piloti brazilian, Felipe Masa: "E rëndësishme është që të bëhet gjëja e duhur. Të enjten (sot) do të mbërrijmë në ‘Spa‘ dhe do na bëjnë shumë pyetje. Gjithsesi, nuk dëshiroj të përfshihem në çështje që nuk kanë lidhje me garat".

Luis Hemilton: Mund të mbetem i papunë

Piloti i skuderisë MekLaren, Luis Hemilton, është i frikësuar se mund të mbetet i papunë, nëse Këshilli Botëror i FIA-s i jep të drejtë Ferrarit në mbledhjen e sotme. Britaniku vazhdon të kryesojë renditjen e kampionatit para shokut të skuadrës, Fernando Alonso, por tashmë është i frikësuar se mund të humbasë gjithçka nga mbledhja e sotme. Nëse FIA pranon provat e reja të Ferrarit, parashikohet një dënim dyvjeçar i skuderisë MekLaren, duke filluar nga sezoni aktual, që do të thotë se Hemilton duhet të braktisë ëndrrën e tij për t‘u bërë kampion në vitin e debutimit. "Ne mund të rrezikojmë gjithçka për të cilën kemi punuar gjatë të gjithë vitit me ekipin. Kur e mendoj këtë gjë, them me vete ‘Mund të mbetem pa punë në fundjavën e ardhshme!‘. Po pastaj çfarë do të ndodhë? Në momentin kur gjithçka po shkonte shumë mirë, vjen kjo goditje e fortë. Është shuam zhgënjyese kur lexon gjëra rreth skuadrës tënde. Nuk dua të tregoj çfarë ndjej, por kam një besim të madh te skuadra ime", u shpreh piloti 22- vjeçar, që ka çuditur të gjithë në vitin e debutimit të tij. Hemilton nuk kursen kritika as për drejtuesit e skuadrave të tjera dhe ato të FIA-s, që kanë vendosur për masa drastike nëse vërtetohet faji i MekLarenit. "Asnjëherë nuk mendoja se do të shprehesha kundër ndonjë gjëje në Formula 1, por politika dhe disa njerëz që duan të bëhen ‘më të mëdhenj‘ se të tjerët janë gjëra të pabesueshme në këtë sport. Ron Denis më ka dhënë gjithmonë mundësi të shpreh talentin tim dhe për mua mbetet një njeri i mirë. Ai po kalon një periudhë të keqe kur shumë njerëz po përpiqen ta ulin sa më poshtë figurën e tij. Ndaj gjëja më e mirë për mua është që ta mbështes. Shpresoj që të mos ketë një vendim kundër MekLarenit, pasi Formula 1 nuk do të ishte më e njëjta pa këtë skuadër. Ndaj duhet që të kryqëzojmë të gjithë gishtat dhe të shpresojmë se një gjë e tillë nuk do të ndodhë", u shpreh piloti britanik për mediat angleze.