Lamtumirë tatuazheve që qëndrojnë në trup gjithë jetën

Dermatologët amerikanë kanë arritur të zbulojnë një bojë, e cila arrin të largohet nga lëkura me rreze lazer


Bërja e një tatuazhi në trup, me apo pa domethënie, është kthyer në modë për shumicën e njerëzve. Mjafton të bësh një xhiro të shkurtër në plazh për të parë se si diejt, delfinët, kryqet apo lloj-lloj objektesh me forma nga më të çuditshmet "mbulojnë" lëkurën e të rinjve. Po ashtu, mjafton të shohësh lëkurën personave të famshëm të këngës dhe kinematografisë në botë, për t‘u bindur plotësisht se të bërit e një tatuazhi për shumë veta është kthyer në mani. Por, nëse në më të shumtën e rasteve ai që mendon të bëjë një tatuazh nuk e çon ndërmend kohën e pendimit apo më pak akoma atë të heqjes së tij nga trupi, sigurisht ka edhe nga ata që mendojnë ndryshe. Ndoshta vendimi për të mbajtur për gjithë jetën në trup një shenjë të tillë, e cila pas disa kohe mund të mos ketë më asnjë domethënie, i ka shtyrë shumë njerëz drejt mendimit për të gjetur mënyrën e largimit të tij. Kështu, Pamela Anderson, pas ndarjes me Tommmy Lee, tatuazhin me emrin e tij në gishtin e dorës së majtë iu desh ta ndërrojë në Mommy (nga Tommy në Mommy), ndërsa Denise Richard, edhe pse është ndarë nga Charlie Sheen në mars të vitit 2005, e mban ende të shkruar me bojë të zezë në kyçin e këmbës së djathtë emrin e tij. Një tatuazh do të ngelet në trup për gjithë jetën, të paktën kështu është menduar deri tani, pasi për ta hequr kërkohet një punë e gjatë, e kushtueshme dhe mbi të gjitha e dhimbshme. Por kohët ndryshojnë. Shumë duan ta fshijnë fluturën shumëngjyrëshe, që kishin vizatuar për të shprehur një moment lirie apo emrin e partnerit, që dikur u kishte premtuar dashuri të përjetshme. Kështu, nëse dikur ishte e vështirë që të hiqje nga trupi një shenjë të tillë, të pikturuar me shumë mund, sot teknologjia ka avancuar shumë, është e thjeshtë ta heqësh. Tani është e mundur të bësh tatuazh apo çdo gjë që dëshiron në çdo pjesë të trupit, duke pasur sigurinë se mund ta heqësh kur të duash me rreze lazer. Dhe, për më tepër, gjithçka mund të ndodhë vetëm brenda një seance, përkundrejt 12, apo ndonjëherë edhe dy vjet, që kërkojnë teknikat aktuale, pa harruar edhe harxhimet marramendëse, rreth 3 mijë euro.

Bojë që qëndron gjatë

Disa dermatologë, në shkollën e mjekësisë së Harvardit, në bashkëpunim me profesor Edith Mathiowitz i Universitetit "Brown" dhe me ndërmarrjen njujorkeze "Freedom-2", kanë zbuluar një bojë që mund të qëndrojë shumë në trup, por jo gjithë jetën.

Kështu, tatuazhet që mund të largohen lehtësisht nëse ndërron mendje, të cilësuar edhe si "regret-free tatoo", bëhen me një bojë, e cila mund të fshihet lehtësisht. Ajo është e përfshirë në kapsula shumë të vogla polimeri (makromolekulë me origjinë sintetike) dhe injektohen në lëkurë me një age të zakonshme, që përdoret për bërjen e tatuazheve. Sa më shumë të qëndrojë boja nëpër kapsula, aq më shumë qëndron në lëkurë edhe tatuazhi, por nëse je mërzitur apo ke ndryshuar mendim mjaftojnë rrezet lazer për ta kthyer lëkurën në gjendjen e saj të mëparshme pa çikatrice apo zona të ngjyrosura, siç ndodh shpesh me mënyrat aktuale që praktikohen. Rrezet lazer janë në gjendje t‘i shpërbëjnë kapsulat, duke bërë të mundur daljen jashtë të bojës dhe kthimin e lëkurës në ngjyrën dhe gjendjen e mëparshme.

Teknika

E njohur me emrin e "microincapsulazione" është shumë e përdorur në mjekësi për qëllime nga më të ndryshmet (për shembull, për të pirë ilaçet në mënyrë që ato të mos bien në kontakt me enzimat e stomakut. Por kjo teknikë futuristike duket se nuk i bind plotësisht dermatologët përtej oqeanit, të cilët nuk i përjashtojnë rreziqet e mundshme të alergjive ndaj kapsulave të polimerit. Por, profesor Mathiowitz e mbron me forcë "krijimin" e tij, sipas asaj që shkruan "Guardian": "Sfida ishte ajo për të gjetur kombinimin e duhur të polimerit dhe ngjyrave, shpjegon eksperti, dhe duhet të bëhet në mënyrë të atillë që, pasi injektohet në lëkurë, të mbetet aty. Tradicionalisht boja e zezë i thith të gjitha gjatësitë e valëve të dritës, ndërsa grimcat tona janë studiuar për të thithur më shumë dritë sipas gjatësive të veçanta të valëve, duke e vënë më mirë në fokus energjinë mbi mikrokapsulat dhe duke e lejuar trupin të heqë bojën e tatuazheve". Boja e re "magjike" do të hidhet në treg brenda fundit të vitit.

Tatuazhi më i vjetër daton në vitin 3300 p.e.s

Tatuazhi, i njohur ndryshe "tatoo", është i shfaqur në shumë kultura, qofshin këto antike apo moderne. Ai i ka shoqëruar gjithnjë burrat, si një shenjë e ekzistencës së tij, sipas zakoneve dhe vendit ku ai ka jetuar, duke e treguar këtë më shumë si një kartë identifikuese të individit, sesa një rit të zakonshëm të një shembulli të maturisë.

Tatuazhet e vjetra në trup janë gjetur në mumien Otzi (daton në vitin 3300 para Krishtit), zbuluar në alpet italiane në vitin 1991. Një tjetër tatuazh i vjetër është zbuluar nga njeriu i Pazyryk, në qendër të Azisë me shumë tatuazhe, të cilat prezantonin kafshë.

Ndër qytetërimet që kanë zhvilluar artin e tatuazheve i pari ka qenë Egjipti, por edhe Roma antike, kryqëzimi i qytetërimit, ku është ndaluar nga Perandori Kostantino.

Popujt që zhvilluan këtë art sinjifikativ ishin të lidhura me sferën oqeanike, në të cilën çdo zonë, pavarësisht zakoneve, ka krijuar karakteristika të ndryshme. Më të famshmet janë ato të Maori nga malet Hagen, japonezë dhe kinezë.

Në Evropë, pasi praktikisht u ndërpre për motive fetare, u rizbuluan në momentin e udhëtimeve në zonën oqeanike.

Rreziqet shëndetësore

Pak a shumë të mëdhenj, me apo pa shkrime, tatuazhet tradicionale qëndrojnë përgjithnjë, por me kalimin e viteve zbehen, nëse nuk janë kryer nga profesionistë, nuk provokojnë efekte anësore, duke përjashtuar vetëm rastet e alergjive. Në çdo rast janë të këshillueshëm të bëhen nga ekspertë, me mjete profesionale dhe në vende higjienike, për të evituar çdo lloj kërcënimi nga mikrobet apo sëmundjet e ndryshme, mes të cilave edhe hepatitin B e C.


Tatutë

Për një tatuazh aget që përdoren zakonisht e shpojnë lëkurën e trupit një deri dy milimetër. Përpara mbërritjes së teknikave me lazer, rreth vitit 1980, mundësia për të hequr një tatuazh ishte shumë e dhimbshme dhe aspak e këshillueshme

Kripa
Një nga metodat më të vjetra për heqjen e tatuazheve është edhe ajo e kripës. Kjo e fundit e mundëson largimin e bojës. Konsiderohet si një nga metodat më të dhimbshme

Dermabrasion
Shtresat sipërfaqësore të lëkurës mund të hiqen me letra që përmbajnë kokrriza të forta dhe të ashpra

Injeksione
Injeksionet e kripës mund të ndihmojnë të "zbehin" ose të heqin komplete të tatuazheve

Ndërrimi i lëkurës me përbërje kimike
Është gjithashtu një mënyrë aspak e këshillueshme. Kështu, lëkura që bie në mënyrë të vazhdueshme bën të mundur edhe heqjen e tatuazhit

Mbulimi
Një tatuazh i vjetër, që tani nuk ju pëlqen më, mund të mbulohet me një të ri, duke përdorur bojë më të errët