Ja shtatë mrekullitë e reja të botës

Titulli: Ja shtatë mrekullitë e reja të botës Wed Jul 11, 2007 1:26 am

Maçu Piçu i Perusë, Petra në Jordani dhe Akropoli grek, ishin ndër objektet e përzgjedhura si shtatë mrekullitë e reja të botës, që pritet të shpallen vetëm pas pak orësh pas një sondazhi masiv mbarëbotëror. Votimi në sondazhin, që mund të jetë më i madhi i kryer ndonjëherë përmes internetit në nivel global, u mbyll mesnatën e djeshme, ndërsa shpallja e fituesve do të bëhet sot në një ceremoni në Lisbonë.

Më shumë se 90 milionë persona kanë votuar deri tani. Organizatorët e këtij sondazhi shprehen se gara është një mënyrë unike për fshirjen e dallimeve kulturore midis kombeve dhe racave të ndryshme në glob, duke vendosur vulën e qytetërimit evropian në të njëjtin nivel me kultura të tjera të njerëzimit, si Maya e Meksikës.

“Jetojmë në një botë ekscentrike”, - u shpreh Tia Vering, zëdhënëse e organizatorëve të votimit në internet për zgjedhjen e Shtatë Mrekullive të Botës. Konkurrentët më të fortë të qytetërimit evropian ishin Akropoli i Athinës, Koloseumi i Romës dhe Kulla Eifel në Paris. Ndërkohë që në garë janë edhe Maçu Piçu (Qyteti i Humbur) në Peru, tempujt e piramidat e qytetërimit Maya në Chichen, Meksikë, Taxh Mahal në Indi, Statuja e Krishtit në Rio De Zhaniero, Brazil, statujat e Ishullit të Pashkëve në Paqësor. Gjithsej konkurrojnë 21 objekte të mëdha të qytetërimit botëror, ku përfshihen edhe Statuja e Lirisë në Nju Jork, SHBA, monumenti parahistorik britanik Stonehenge, si dhe Pallati i Operave të Sidnei-t.

Lista e shtatë mrekullive të reja të botës ka shkaktuar indinjatë në Itali, ku gazeta më e madhe katolike, “Avvenire” kritikoi organizatorët për mospërfshirjen e objekteve kristiane në këtë listë. “Si është e mundur që 2000 vjet civilizim kristian nuk kanë arritur të ‘prodhojnë’ një mrekulli të vetme”, - shkruante “Avvenire” në një editorial. Organizatorët do ta shpallin sot listën e shtatë mrekullive të reja të botës, por nuk do të bëjnë të ditur numrin e votave që ka marrë secila prej tyre.
Mrekullitë e vjetra të botës ndodhen të gjitha në rakonin e Mesdheut dhe vetëm njëra prej tyre konsiderohen ende sot si e tillë, Piramidat e Gizës.

Origjinalet u zgjodhën nga një person i vjet i vjetër, një shkrimtar i Greqisë së lashtë. Osama Abbas, ministri i Turizmit i Jordanisë, tha se votimi në internet do ta ndryshonte të gjithë këtë. “Mrekullitë e vjetra të botës u zgjodhën nga një person i vetëm dhe bëhet fjalë për 2500 vjet më parë, shumica e tyre janë zhdukur tashmë dhe ndaj ishte koha të mendonin për mrekulli të reja. “Unë mendoj se është e ndershme dhe shumë demokratike që e gjithë bota të ketë mundësinë të votojë për mrekullitë e reja të saj.

Disa vende kanë organizuar edhe fushata për të promovuar objektet kandidate, si për shembull Brazil ka shtypur bileta autobusi që u kujton të gjithëve të votojnë dhe një këngëtar indian ka shkruar një këngë për Taxh Mahalin. Por jo të gjithë janë entuziastë për këtë nismë. UNESCO ka refuzuar të mbështesë konkursin për shtatë mrekullinë e reja, duke deklaruar se mrekullitë nuk mund të zgjidhen nga publiku, por nga ekspertët e historisë dhe arkeologjisë.