Sporti Shqiptar

Info sportive rreth evenimenteve kryesore sportive ne Shqiperi.

FSHF është në mëdyshje nëse trajneri Oto Bariç do vazhdojë të jetë në krye të stolit të Kombëtares edhe pas përfundimit edicionit. Shkak për këtë është mosha e kroatit, e cila vazhdon të konsiderohet si shumë e madhe, për të qëndruar në futbollin e luajtur. Sipas presidentit të institucionit që drejton sportin e top-këmbës në Shqipëri, Armand Duka, është ende shpejt për të folur rreth rinovimit, por "realisht mosha është një pengesë e madhe për Bariçin dhe Kombëtaren dhe na bën të reflektojmë". Ndërkohë, njëshi i federatës dje ka zhvilluar edhe analizën me vartësit e tij, ku kritikat nuk kanë munguar për ecurinë e sezonit futbollistik, që është karakterizuar nga problemet.

Më në fund, përfaqësuesja kuqezi kishte arritur të gjente një trajner, që jo vetëm ka eksperiencë, por edhe guxim. Në gjysmën e parë të eliminatoreve të Euro 2008, trajneri Bariç ka rinovuar skuadrën (duke lënë jashtë saj lojtarë si Hasi, Tare, Aliaj e ndonjë tjetër), ka ndërtuar një skuadër taktikisht perfekte dhe ajo që është më kryesore ka marrë rezultate pozitive të njëpasnjëshme, që kanë sjellë edhe vendin e katërt në Grupin G. Por... edhe ai e ka një defekt: moshën e madhe. 75 vitet e drejtuesit të stolit, që fillimisht është parë me skepticizëm, janë një pengesë reale për rinovimin e kontratës së tij. "Mendoj se është ende shpejt që të flasim rreth të ardhmes së trajnerit Bariç dhe çështjes së rinovimit të kontratës së tij. Gjithsesi, kjo është diçka për të cilën jam menduar", ka deklaruar njëshi i futbollit, Armand Duka. "Ende nuk mund të them diçka konkrete, pasi nuk e kam vendosur se çfarë do bëjmë, por për të qenë i sinqertë, mosha e trajnerit më bën të reflektoj. Gjithsesi, duhet të presim fundit e eliminatoreve të evropianit".

Vetëm pas ndeshjes së fundit me Rumaninë, më 12 shtator të këtij viti, palët do ulen për të diskutuar dhe për të vendosur kushtet e tyre. Trajneri ka shprehur dëshirën e tij për të vazhduar punën me Kombëtaren. Detyrë që duket se do jetë e fundit në futbollin e luajtur pas një karriere të gjatë dhe relativisht të suksesshme. "E përsëris, asgjë nuk është e vendosur dhe vetëm në përfundim të eliminatoreve të Euro 2008 do mendojmë për të pasur bisedime me trajnerin". Nëse nuk rinovon me Shqipërinë, Bariç duket se e ka vendin gati si zyrtar i lartë i klubeve në Austri, ku reputacioni i ka paraprirë gjithmonë. Rapidi i Vjenës dhe Shturmi i Gracit prej kohësh po tentojnë ta bindin që ta punësojnë si drejtor sportiv.

Jorgen Çetaj e mban fjalën. Bën realitet deklaratën e tij për "Shqip" se do të kthehej në Angli nga kampionati evropian i të rinjve me titullin e kampionit të Evropës. Ashtu ka ndodhur. Boksieri Çetaj është kurorëzuar kampion Evrope për kadetë në peshën 75 kilogramë gjatë këtij kampionati të zhvilluar në Sardenjë. Gjashtëmbëdhjetëvjeçari shqiptar, që stërvitet për klubin "Walcot" vetëm për një pikë ka mundur favoritin për të fituar këtë titull, italianin Xhulio Skiavon: vendimi gjyqtarëve 15-14 shpalli fitues shqiptarin premtues të dorezave. Që në raundin e dytë kur ra gongu, Çetaj ishte superior ndaj bashkëmoshatarit të tij italian, që e kuptoi se po i ikte nga duart titulli. Raundi i tretë do të fliste tërësisht për shqiptarin, i cili hidhet në sulm, duke i dhënë disa goditje të forta kundërshtarit, që nuk e lejuan atë të kundërpërgjigjej dhe të fitonte titullin e kampionit të Evropës. Gjatë një deklarate, ai tha se "të jesh kampion Evrope është me të vërtetë diçka fantastike". Më tej, Çetaj shprehet se që në fillim e mendoi se kishte mundësi të mira për të fituar këtë kompeticion, por kurrë nuk e mendonte se ky titull do të bëhej i tiji. "Kur pashë në finale se sa i madh ishte kundërshtari mendova: O Zot. Ai është më i madh se unë, kishte krahë të gjatë. Ai ishte një boksier i fortë", tregon Çetaj. "Në përfundim të raundit të dytë, trajneri im më inkurajoi të boksoj fort. Mblodha veten, duke lëshuar goditje drejt kundërshtarit. Edhe ai nuk qëndroi pasiv. Mora dy goditje të forta në fund dhe kjo ishte e gjitha që ai mund të bënte. Ishte një duel i vështirë, jam i lumtur që e menaxhova situatën duke dalë fitimtar". Brenda katër muajve Çetaj është shpallur kampion i Anglisë në Londër, më pas ai do të fitonte kompeticionin "Boks për katër shtete", ku u shpall kampion i Britanisë. Së fundmi, erdhi edhe triumfi si kampion i Evropës.

Erjon Bogdani është në udhëkryqin vendimtar të karrierës së tij dhe kjo duket qartë nga mënyra se si shprehet për të ardhmen. Pas rënies së Kievos në Serinë B, golashënuesi shqiptar tashmë duhet të vendosë nëse do të qëndrojë me këtë ekip apo të tentojë kalimin në një skuadër tjetër të Serisë A. Në një intervistë të dhënë për "l‘Arena", Bogdani tregon se është i gatshëm të sakrifikojë, por nuk dëshiron të jetë i vetmi që do ta bëjë një gjë të tillë. Ai tregon se do të vendosë rreth të ardhmes vetëm pas kthimit në Itali, pasi të diskutojë me drejtuesit e Kievos dhe të dëgjojë projektin e tyre.

Bogdani, cila është e vërteta juaj?

Nuk kam folur me asnjë, nuk më ka kontaktuar askush. Mbetem një lojtar i Kievos. Kur të kthehem nga pushimet do të flas me drejtuesit e klubit tim. Por jam i qetë, shumë i qetë.

A dëshironi të qëndroni?

E dini që kam firmosur një kontratë trevjeçare. U "martova" me idealet e Kievos. Por jam në pritje të njohjes me projektet e reja të shoqërisë.

Cili është projekti juaj?

Rikthimi. Rilindja. Dua të rifitoj menjëherë Serinë A.

Me fanellën e Kievos?

Nëse ekziston një projekt i rëndësishëm, edhe unë jam i gatshëm të bëj një sakrificë të vogël.

Por kërkoni garanci, apo jo?

Me garanci unë kuptoj konfirmimin e emrave më të rëndësishëm të këtij Kievo: Lana, Mandeli, Pelisier dhe të tjerët. Të luash në një skuadër të fortë të jep mundësi të gjesh stimuj të rinj, të rinisesh menjëherë, të japësh maksimumin.

Çfarë nuk do të pranonit?

Nuk mund të jem i vetmi që sakrifikohem, nuk duhet të jem i vetmi që qëndroj. Por mendoj se kjo është e kuptueshme. E di mirë që te Kievo i bëjnë gjërat në mënyrën e duhur dhe që do të kenë menduar që tani për të ardhmen. Pres që të ulem në tavolinë për të biseduar. E them këtë, pasi besoj te potenciali i kësaj skuadre, por është e domosdoshme që të vrapojmë të gjithë së bashku.

Kievo ra në Serinë B vetëm në javën e fundit, e keni rikujtuar këtë moment?

Shumë, shumë herë. Por tashmë e kam ndarë mendjen. Duhet të lëmë pas të kaluarën. Është absurde dhe e trishtueshme, por gjërat rodhën kështu.

Përse Kievo nuk arriti të shpëtonte?

Paguam shumë nisjen e vështirë të kampionatit, humbëm pikë rrugës dhe në javën e fundit gjithçka luajti kundër nesh. Por ka mbaruar koha e ndarjes së fajeve, kemi detyrën të shohim përpara.

Ju shihni me interes edhe gazetat sportive të cilat shkruajnë...

Shkruajnë shumë gjëra dhe më bëhet qejfi. Por nuk është se ua vë shumë veshin. Këtu (në Shqipëri) jam larg. Mediat shqiptare paraqesin lajme që vijnë nga Italia, ndërsa burimi im i vetëm është Kievo. Siç e thashë më parë, gjithçka ka kohën e saj.

A keni një mesazh për tifozët?

Është ende shumë herët për të dhënë mesazhe. Tani nuk kam të tillë. Do të kthehem në Verona, te Kievo. Do të flas me Sartorin dhe më pas do të vendosim bashkërisht.

Flitet për Rexhinën, Kaljarin, Torinon dhe Atalantën...

E di, e di. Jam në dijeni të gjithçkaje. Por tani po mendoj vetëm për plazhin. Do të qetësohem dhe të mos mendoj për asgjë. Në këtë mënyrë, kur të kthehem do të jem më i karikuar. Do të flasim, do të flasim për gjërat thelbësore. E kam thënë që unë sakrifikohem. Por jo i vetëm. Në të kundërt do të marr në konsideratë hipoteza të tjera. Megjithatë, me shoqërinë nuk do të ketë probleme, pasi gjithmonë jemi kuptuar në mënyrë të shkëlqyer.




Ëndrra e fshehtë quhet Napoli

Ndonëse Kaljari është gati të nënshkruajë një kontratë me sulmuesin shqiptar, ky i fundit duket se ëndërron të luajë në San Paolo me fanellën e Napolit. Në një intervistë për "Radio Goal", sulmuesi ka shprehur pëlqimin e tij për këtë ekip. "Nuk e di nëse Napoli ka kërkuar informacione për mua te Kievo, di vetëm që kanë ardhur oferta nga shumë skuadra, edhe pse nuk e di sa të tilla janë konkrete. Napoli është një piacë e bukur që i tërheq të gjithë, do të isha shumë i lumtur të luaja me këtë ekip, pasi mbetet mes preferencave të mia. Këtë vit me rikthimin e Juventusit, Napolit dhe Xhenoas në Serinë A, do të bëhet një kampionat shumë i bukur dhe më i vështirë për ne sulmuesit", deklaroi Bogdani për radion napolitane.

Shqipëri- Holandë do të luhet në "Qemal Stafa"

Takimi i 12 shtatorit mes Shqipërisë dhe Holandës, do të luhet në stadiumin kombëtar "Qemal Stafa". Edhe pse mungonte zyrtarizimi, drejtuesit e Federatës Shqiptare të Futbollit dhe drejtori i impiantit kombëtar në vend, kanë arritur një marrëveshje dy ditë më parë, sipas të cilës takimi luhet në kryeqytet dhe mbetet për t'u vendosur vetëm ndarja e fitimeve. Dhales ishte edhe dje në FSHF, ku mori konfirmimin e krerëve të këtij institucioni.

Në Kroaci, Bariçin e duan spiun për ekipet shqiptare

Mospasja njohuri për Teutën, ka bërë që trajneri i Slaven Belupos, kundërshtarit të durrsakëve në Kupën UEFA, të kërkojë ndihmën e Oto Bariçit

Mospasja njohuri për Teutën, ka bërë që trajneri i Slaven Belupos, kundërshtarit të durrsakëve në Kupën UEFA, të kërkojë ndihmën e Oto Bariçit. Në një pronocim dhënë dje për albania-sport.com, tekniku Krunoslav Jurçiç është shprehur se për të marrë njohuri në lidhje me ekipin shqiptar, do të pyesë trajnerin aktual të Shqipërisë.

Bariç është një kroat dhe e ka ndjekur në disa ndeshje Teutën, kështu që informacioni i tij do të ishte mëse i nevojshëm për ekipin nga Koprivnica, që në sezonin e shkuar ka përfunduar në vendin e katërt në kampionatin vendas. Slaven Belupo është një skuadër e formuar nga shumë futbollistë të rinj dhe tekniku i saj natyrisht që ka frikë në përballjet e këtij niveli. “Të them të drejtën nuk i doja shqiptarët që në fazën e parë.

Madje nuk doja asnjë ekip ballkanas në këtë tur”, është shprehur Jurçiç. Ai ka deklaruar gjithashtu se fakti që ndeshja e kthimit luhet në Shqipëri, është një faktor jo shumë pozitiv për skuadrën e tij. “Do të kisha preferuar ta luanim në fushën tonë ndeshjen e kthimit. Ne jemi një ekip me shumë lojtarë të rinj të ardhur në ekip dhe që nuk kanë luajtur shumë ndeshje bashkë. Ekipet ballkanas janë shumë të ashpër dhe shpeshg të papërshtatshëm, megjithëse them se do të bëjmë gjithçka për të eleminuar Teutën.

Për këtë do të kërkoj edhe ndihmën e Oto Bariçit dhe të të gjithë trajnerëve e lojtarëve kroatë që kanë qenë në Shqipëri. E them këtë pasi, nuk kam asnjë lloj informacioni për Teutën”, është shprehur trajneri i Slaven Belupos, Krunoslav Jurçiç. Një tjetër trajner kroat që ka qenë në Shqipëri, është edhe Luka Bonaçiç, i cili drejtoi për shumë muaj Dinamon.

UEFA ndan parate per Evropen, 670 mije europe per skuadrat shqiptare

UEFA ka bere te ditur shperblimet qe do t’u jape klubeve per pjesemarrjen ne aktivitetet europiane ne sezonin e shkuar. Behet fjale per qindra milione euro te ndare ne menyra te ndryshme, ne baze te rezultateve te arritura nga secili klub. Me te fituarit, kane qene klubet qe kane marre pjese ne Champions League, me Milanin qe ne total ka mundur te perfitoje 39, 6 milione euro vetem nga fondet e UEFA-s, pa llogaritur ketu parate e ardhura nga burime te tjera si kontratat me sponsoret apo ato te te drejtave televizive. Pas kampioneve, vjen Çelsi me 34,66 milione dhe Liverpuli me 32,22 milione euro. UEFA e ka vleresuar me 400 mije euro çdo ndeshje te luajtur ne grupet e Liges se Kampioneve, me 600 mije euro fitoren dhe me 300 mije euro barazimin. Persa u perket klubeve shqiptare, me i fituari do te jete Elbasani qe do te marre 160 mije euro per daljen kampion dhe 100 mije euro per pjesemarrjen ne turin e pare, ku verdheblute u eleminuan nga lituanezet e Ekranas. Çdo klub qe ka marre pjese ne kupen UEFA ka perfituar 70 mije euro per çdo tur te luajtur dhe 100 mije euro per pjesemarrjen. Ç’ka do te thote se Tirana merr 240 mije euro ne total, nderkohe qe Dinamo vetem 170, pasi nuk mundi te kualifikohej per ne turin e dyte.

Dopingu, Fetie Kasaj humb Olimpiadën

Pezullimi 2 vjeçar i dhënë nga Federata Botërore e Peshëngritjes, ka bërë që shtangistja shqiptare Fetie Kasaj t'u thotë lamtumirë shpresave për të marrë pjesë në Lojërat Olimpike të Pekinit në vitin 2008. Drejtuesit e Federatës Shqiptare shpresonin në një dënim minimal për ta pasur nënkampionen e Evropës për këto Lojëra, por vendimi i Federatës Botërore ka qenë maksimal. Kasaj u kap me substancën stanozolol në Europianin e zhvilluar në Strasburg të Francës në muajin prill. Ndërkohë, po me dy vjet pezulluar edhe trajneri Faruk Kalleshi.

UEFA, presion FSHF-së dhe klubeve për stadiumet

UEFA kërcënon me masa klubet, por edhe Federatën në rast se nuk plotësohen kushtet e liçensimit të stadiumeve për sezonin e ardhshëm. Organizmi më i lartë i futbollit europian, u ka kërkuar drejtuesve të FSHF-së që pranimi i klubeve në kategoritë e futbollit shqiptar të bëhet pasi të jenë shqyrtuar më parë kushtet e infrastrukturës. "Në këtë rast rrezikojmë edhe ne si Federatë, kështu që jemi të detyruar të marrim masa", ka thënë sekretari Mici. Komiteti në mbledhjen e të mërkurës ka shtyrë afatin e dorëzimit të dokumentave për klubet.

Shqipëria, e parafundit në vazot e Botërorit

Deklarata e Oto Bariç se do të përpiqet ta ngjisë një vazo Shqipërinë në shortin e kampionatit botëror, nuk duket më realiste. Ndryshimi i sistemit të grupeve në zonën europiane për kampionatin botëror të vitit 2010, ka vënë para kombëtares shqiptare rrezikun që të jetë sërish e parafundit në grupet kualifikuese. Një fakt i tillë pohohet nga burime zyrtare në FSHF, sipas të cilave, Shqipëria duhet të arrijë një numër të lartë pikësh që të mund të përfitojë një ngjitje në vazo, që me sistemin e ri, do të thotë të paktën lënia prapa e dy skuadrave në grup. Një gjë e tillë u pa për eleminatoret e Euro 2008, ku Shqipëria në grupin G duhet të kishte dy ekipe më të dobta, të cilat qëlluan Bjellorusia dhe Luksemburgu. Në eleminatoret e shkuara, kombëtarja kuqezi nën drejtimin e Brigel arriti 13 pikë në 12 ndeshje, me nje koeficient 1.08, gjë që i dha mundësinë e ngjitjes një vazo. "Nëse arrihet sërish e njëjta kuotë pikësh, atëherë automatikisht ne do të jemi të parafundit në grup", ka sqaruar për këtë zëdhënësi për shtyp i FSHF-së, Lysjen Nurishmi. "Vetëm nëse arrijmë një numër të madh pikësh (ndoshta 15 apo 16 në 12 ndeshje) atëherë mund të pretendojmë për lënien pas të dy skuadrave të dobta", sqaron më tej Nurishmi. Një gjë e tillë pohohet edhe nga ish-shefi i ekipeve kombëtare në Federatë, Besnik Çela, njeriu i cili është marrë me këtë problem për vite të tëra. "Ne na duhet të marrim një kuotë shumë më të lartë pikësh që të kemi dy skuadra më të dobta në grup, ndryshe, me sistemin e ri të pikëve, do të kemi vetëm një. Koeficienti do të llogaritet në fund të këtyre eleminatoreve dhe Shqipërisë i duhet të kalojë disa skuadra", shprehet ish shefi i ekipeve kombëtare. Një gjë e tillë do të thotë që kuqezinjve të Oto Bariç u duhet minimumi të lënë mbrapa ekipe të rangut të Sllovenisë për të ruajtur pozitat e shortit për Euro 2008. Veç kësaj, duhen kaluar në renditjen e koeficientëve të paktën 17 skuadra të tjera të kontinentit, gjë që nuk duket shumë e lehtë duke parë se në 8 grupet aktuale të Europianit, vetëm pak skuadra e kanë më të ulët se Shqipëria koeficientin, ndonëse gjithçka do të llogaritet në fund të eleminatoreve, në muajin nëntor.

"Legjionarët", të gjithë në fushë kundër Turqisë


Geri Malaj dhe Albi Kondi do të provohen për herë të parë




Trajneri Artan Bushati do të ketë më në fund në dispozicion "legjionarët" për ndeshjen miqësore kundër Turqisë, më 22 gusht. Tekniku ka publikuar dje listën e futbollistëve të grumbulluar për këtë sfidë testuese, ku figurojnë edhe emrat e debutuesve Geri Malaj dhe Albi Kondi, dy futbollistë që kanë qenë prej kohësh në vëzhgimin e FSHF-së. Tashmë ata do të kenë mundësinë të vihen në provë, duke u bërë kandidatë për një vend në formacionin e Kombëtares. Ndërkohë, për shkak të një dëmtimi, mungon sulmuesi Xhulian Rrudho, i cili aktivizohet me Sansovinon, por është grumbulluar një tjetër lojtar i kësaj skuadre, Damjan Gocaj.

Pas kontaktesh të shumta me lojtarët në fjalë dhe familjarët e tyre, duket se Geri Malaj dhe Albi Kondi do të zbresin në fushë me fanellën kuqezi të përfaqësueses Shpresa. Dy lojtarët janë përfshirë në listën e trajnerit Bushati për ndeshjen miqësore me Turqinë, ku do të kenë mundësinë të provojnë se janë elementë të domosdoshëm për ekipin Shpresa. Malaj ka qenë prej kohësh në vëzhgimin e stafit të U21, por mesfushori që aktivizohet me ekipet e moshave të Deportivo La Korunjës në Spanjë, deri tani nuk kishte sjellë një përgjigje pozitive. Por gjatë javëve të fundit ka pasur një kontakt të vazhdueshëm mes trajnerit Bushati dhe familjarëve të lojtarit, të cilët kanë garantuar se i mbiquajturi Geri do të paraqitej në grumbullimin për ndeshjen me përfaqësuesen turke. Në të njëjtën kohë, kontaktet e vazhdueshme kanë bërë të mundur edhe grumbullimin për këtë sfidë të Albi Kondit, sulmuesit të talentuar që aktivizohet në Greqi me Panionios. Ndonëse lojtari ka marrë para pak ditësh pasaportën greke, ai nuk e ka refuzuar ftesën e U21 të Shqipërisë, duke u shprehur i gatshëm të luajë që në miqësoren e 22 gushtit. Kondi ka shpërthyer në ndeshjet miqësore të skuadrës së tij dhe duket se do të ketë më shumë minuta në dispozicion për këtë sezon me ekipin grek. Një tjetër emër i ri në listë është ai i Damjan Gocajt, sulmuesit që aktivizohet me Sansovinon në Serinë C2 në Itali. Futbollisti do të provohet nga stafi kuqezi për të parë, nëse do të bëjë pjesë në të ardhmen në planet e përfaqësueses U21. I gatshëm për këtë sfidë është edhe portieri Sajmir Ujkani, i cili sapo ka kaluar në radhët e Palermos, ku stërvitet me ekipin e parë. Për sa i përket kampionatit shqiptar, përveç grupit të zakonshëm të lojtarëve, Bushati ka grumbulluar edhe disa emra të rinj, duke filluar nga Besmir Arifaj i Kastriotit, dhe Jozef Thana, i Skënderbeut. Të dy këto futbollistë të rinj janë paraqitur mirë në ndeshjet përgatitore të skuadrave të tyre dhe do të shihen si alternativa të mundshme të formacionit titullar.

Shqetësimi i Bushatit vjen nga dy mungesa të rëndësishme në skuadrën e tij, i pari është Xhulian Rudho, i cili është dëmtuar gjatë fazës përgatitore me Sansovinon dhe nuk do të jetë për këtë ndeshje, megjithatë, pritet që sulmuesi të riaftësohet për sfidat zyrtarë kundër Italisë dhe Koracisë. Mungesa tjetër është ajo e Jahmir Hykës. Mesfushori që këtë sezon do të luajë me Tiranën, është grumbulluar nga trajneri Bariç për sfidën miqësore kundër Maltës. Si rrjedhojë, Bushati nuk do të ketë mundësi ta shohë atë në veprim me U21 për këtë sfidë, duke pasur një detyrë të vështirë për ta planifikuar këtë futbollist në skuadër për ndeshjet e ardhshme. Hyka është aktivizuar si titullar vetëm në ndeshjen kundër Ishujve Faroe, ku arriti të shfaqte një formë shumë të mirë. Por grumbullimi i tij nga trajneri Bariç me kombëtaren e madhe ka komplikuar planet e Bushatit për përfaqësuesen U21, pasi edhe në rast se do ta ketë të gatshëm futbollistin për ndeshjet zyrtare, nuk do ta ketë provuar lojtarin edhe në role të reja në fushë. Sfidat ndaj Italisë dhe Kroacisë janë dy më të rëndësishmet për përfaqësuesen Shpresa, pasi një rezultat pozitiv do të ndryshonte krejtësisht renditjen e grupit ku bën pjesë kombëtarja jonë.



Lista e kombëtares U21


Sajmir Ujkani Palermo

Olsi Bishani Vllaznia

Maringlen Shoshi Apolonia

Renato Arapi Besa

Andi Lila Besa

Besmir Arifaj Kastrioti

Bledion Guga Flamurtari

Sadush Danaj Besëlidhja

Arben Likmetaj Teuta

Jetmir Sefa Tirana

Gilman Lika Vllaznia

Elis Bakaj Partizani

Gerhard Progri Partizani

Albi Kondi Panionios

Emiljano Vila Teuta

Geri Malaj Deportivo

Erando Karabeci Partizani

Alsidi Tafili Vllaznia

Jozef Thana Skënderbeu

Vangjel Mile Dinamo

Xhevahir Sukaj Vllaznia

Enco Malindi Partizani

Damian Gocaj Sansovino

Oto Bariç, pa surpriza për Holandën
Ambasada holandeze, e shqetësuar për sigurinë e 400 tifozëve që do të shohin ndeshjen



Trajneri i përfaqësueses shqiptare, Oto Bariç, ka bërë dje publike listën e futbollistëve të grumbulluar për ndeshjen eliminatore të EURO 2008 ndaj Holandës. Kroati ka preferuar që të mos bëjë surpriza për këtë takim, duke konfirmuar ato emra që pa në veprim gjatë miqësores me Maltën. Megjithatë, ky grup lojtarësh është reduktuar nga 21 në 19, pasi për takimin e 12 shtatorit nuk do të jenë të disponueshëm mesfushorët Ervin Skela dhe Besart Berisha, i pari i pezulluar, ndërsa i dyti i dëmtuar. Ndërkohë që në formacionin e Kombëtares do të kthehet Lorik Cana, i cili mungoi ndaj Maltës edhe pse i përfshirë në listë nga trajneri Bariç.

Duket se Kombëtarja shqiptare do të eksperimentojë një rreshtim ndryshe ndaj Holandës, me mendjen te siguria në prapavijë, pasi kjo shihet nga numri i madh i mbrojtësve të grumbulluar. Curri, Dallku, Dede, Vangjeli dhe Rrustemaj janë konfirmuar prej kohësh si pjesë e pandarë e përfaqësueses, ndërsa bie në sy se Bariç ka vendosur t‘i besojë përsëri Erjon Xhafës. Ky i fundit u aktivizua në pjesën e dytë të takimit me Maltën dhe duket se e ka bindur trajnerin kroat me paraqitjen e tij.

Ndryshime rrënjësore do të pësojë reparti i mesfushës, ku mungojnë dy titullarët Skela e Berisha. Cana, Lala, Muka dhe Haxhi, duket se do të formojnë katërshen e mesfushës për këtë sfidë. Bie në sy pikërisht kthimi i Haxhit mes mesfushorëve, pasi në të gjitha takimet e fundit ai ishte aktivuar rregullisht në krahun e majtë të mbrojtjes. Normalisht, Cana dhe Lala do të formojnë digën para mbrojtjes, me detyrën për të ndalur avancimet e mesfushorëve holandezë, ndërsa Muka dhe Haxhi do të veprojnë nga krahët. Duro, Bulku dhe Hyka janë alternativat për këtë repart, ku Bariç mund të improvizojë edhe një rreshtim më ofensiv falë aktivimit të tyre në pjesën e dytë të ndeshjes. Kapllani, Bogdani, Bushi dhe Salihi janë katër sulmuesit e grumbulluar për këtë sfidë, ndërsa mendohet se dy të parët do të jenë titullarë.

Nëse dy kombëtaret thuajse kanë përcaktuar gjithçka për ditën e ndeshjes, organizimi i saj kërkon më shumë perfeksionim dhe kjo është kuptuar nga takimi i djeshëm mes presidentit të FSHF-së, Armand Duka dhe ambasadorit të Holandës në Shqipëri, Seeder Van Voorst. Ky i fundit është interesuar për kushtet e akomodimit të përfaqësueses holandeze në Tiranë, ndërsa një interes i veçantë i është kushtuar trajtimit të tifozerisë që do të vijë nga "vendi i tulipanëve" për të ndjekur takimin. Mendohet që numri i tyre të arrijë në 400 dhe ambasadori holandez është interesuar për sigurimin e tyre nga forcat e rendit gjatë qëndrimit në vendin tonë.


Lista e Kombëtares


Portierë: Arjan Beqaj, Isli Hidi

Mbrojtës: Debatik Curri, Armend Dallku, Nevil Dede, Erjon Xhafa, Kristi Vangjeli, Blerim Rrustemaj

Mesfushorë: Lorik Cana, Altin Lala, Devis Muka, Ervin Bulku, Altin Haxhi, Klodian Duro, Jahmir Hyka

Sulmues: Hamdi Salihi, Edmond Kapllani, Erjon Bogdani, Alban Bushi

Për të dytën herë, Holanda fiton me Shqipërinë falë ndihmës së gjyqtarëve. Anglezi Rajli ka konfirmuar se është një gjyqtar i çuditshëm, ndërsa i ka mohuar një gol të rregullt Kombëtares shqiptare dhe ka larguar nga fusha e lojës me karton të kuq Canën, ndërsa lejonte çdo gjest antisportiv të holandezëve. Me një ndeshje të jashtëzakonshme të Kombëtares shqiptare, gjyqtari bëhet protagonist absolut, duke i krijuar kushtet skuadrës së Van Basten për të arritur një fitore në minutat e fundit.

Si Bariç, ashtu edhe Van Basten respektuan formacionet që kishin deklaruar ditën para ndeshjes. Ndërsa kuqezinjtë luajnë me një 4-4-2 të thjeshtë, Holanda kundërpërgjigjet me një 4-3-3, për të shfrytëzuar depërtimet nga krahët të Babel dhe Van Persit. Prova e parë drejt portës kuqezi vjen nga Babel, që gjuan nga jashtë zonës, po nuk gjen kuadratin. Më pas janë dy goditje këndi radhazi për kuqezinjtë, që vënë në vështirësi Van Der Sar. Në të dytën, Kapllani ka mundësinë të dërgojë topin në rrjetë, por gjyqtari Rajli ndalon aksionin, duke pretenduar për një faull të sulmuesit shqiptar. Për disa minuta ndeshja është e qetë, derisa afron minuta e 19-të, kur Van Persi ekzekuton një goditje dënimi që ndalet nga Beqaj, dhe më pas mbrojtja largon rrezikun. Tani janë holandezët që kontrollojnë lojën qetësisht, ndërsa përfaqësuesja është e tërhequr mbrapa, luan me topa të gjatë drejt Bogdanit dhe Kapllanit, por pa krijuar rreziqe. Holanda sulmon kryesisht në krahun e djathtë, ku veprojnë Melkiot, Shnajder dhe Van Persi, por Duro dhe Vangjeli arrijnë të kontrollojnë mirë zonën e tyre. Rasti i parë për t‘u shënuar në portën holandeze vjen nga këmbët e Duros, i cili gjendet në një pozicion të favorshëm në minutën e 24-t, por gjuajtja e tij nuk gjen kuadratin. Më pas vijojnë disa minuta studimi, me lojën që zhvillohet kryesisht në mesfushë dhe holandezët mendojnë të zgjidhin gjithçka me gjuajtjet nga jashtë zonës, por pa arritur të zbatojnë planin e tyre. Gjyqtari Rajli mbyll një sy disa herë për ndërhyrjet e parregullta të holandezëve, duke acaruar më shumë situatën. Por ai bën "të pabërën" në minutën e 46-të, ku penalizon dukshëm përfaqësuesen tonë. Muka ekzekuton një goditje dënimi, Melkiot kërcen dhe me kokë e dërgon topin në portën e tij. Kuqezinjtë gëzojnë, por çuditërisht Rajli anulon golin pa asnjë arsye të dukshme, duke tensionuar më shumë situatën. Ky episod i jep fund pjesës së parë të takimit.

Pjesa e dytë fillon me ndryshim të kuqezinjve, ku Bushi futet në lojë në vend të Kapllanit. Sulmuesi bëhet menjëherë protagonist, që në minutën e 3-të, duke tentuar nga larg portën e Van Der Sar, por gardiani i holandezëve arrin të mbrojë kuadratin e portës së tij. Kuqezinjtë duken më agresivë dhe në minutën e 51-të është Cana që i afrohet shumë golit të avantazhit, me një gjuajtje nga jashtë zonës, që Van Der Sar e devijon me vështirësi në goditje nga këndi. Por holandezët e kuptojnë që nuk mund të luajnë qetësisht dhe hidhen në sulm. Është Melkiot që vë në provë aftësitë e Beqajt në minutën e 58-të, me portierin kuqezi që arrin të bllokojë në dy kohë. Më pas është De Zeu që provon nga jashtë zonës, ndërsa Beqaj arrin të devijojë përsëri, duke shpëtuar portën. Van Basten duket i shqetësuar dhe vendos të bëjë një zëvendësim në mbrojtje, duke larguar Bouma që kishte probleme me shpërthimet e Bushit, për të aktivizuar Emanuelson, i cili është shumë aktiv në krahun e djathtë me aksione të rrezikshme. Bariç kundërpërgjigjet duke larguar Duron për të hedhur në fushë Haxhin, i cili pozicionohet si mesfushor në krahun e majtë me detyra më shumë mbrojtëse. Holandezët detyrohen t‘i kthehen taktikës së gjuajtjeve nga jashtë dhe në minutën e 75-të është Shnajder që vë në provë reflekset e Beqajt, i cili arrin të devijojë në mënyrë të shkëlqyer duke shpëtuar portën kuqezi. Van Basten përdor kartën e fundit në dispozicion, duke aktivizuar Kajt në vend të Babel, të lënë në hije nga mbrojtja kuqezi, për të shfrytëzuar aftësinë e tij para portës në minutat e fundit. Bariç mbrohet, duke larguar Bogdanin, për të shtuar një tjetër lojtar në mesfushë, Bulkun, që pozicionohet menjëherë në qendër. Situata tensionohet dhe në minutat e fundit Cana ndëshkohet me një karton të kuq, pas një zënke me Shnajder dhe Van Nistelroi, ndërsa dy "kundërshtarët" e tij dënohen vetëm me karton të verdhë. Tashmë gjithë loja është para portës kuqezi, ku të gjithë lojtarët janë vënë në gardh për të mbrojtur rezultatin historik, por një gabim i pafalshëm në minutën e parë shtesë sjell golin e Holandës, me autor Van Nistelroi, që devijon topin në portën e Beqajt. Ndeshja mbyllet në mënyrën e shëmtuar, me një fishekzjarr që shpërthen përmbi kokën e Melkiot dhe me gjyqtarin Rajli që tregohet hapur kundër kuqezinjve, duke mbyllur para kohe ndeshjen. Kaq mjafton për këtë ndeshje, ku si në takimin e parë, gjyqtari ishte më protagonist se sa futbollistët në fushë.



Bariç: E padrejtë!

Trajneri i përfaqësueses shqiptare ka qenë tepër i nervozuar pas përfundimit të takimit, ndërsa është shfaqur i irrituar me mënyrën se si u drejtua takimi nga gjyqtari anglez Rajli. "I dënoj vendimet e gjyqtarit në këtë ndeshje. Anulimi i golit ishte i padrejtë dhe nuk meritonim këtë ndëshkim. Fatkeqësisht, e kam thënë edhe më parë se një gjë e tillë u ndodh atyre që cilësohen skuadra të vogla. Në ndeshjet e ardhshme do të luajmë për të marrë pikë", u shpreh Bariç pas përfundimit të ndeshjes.